Wakulima wa shayiri waaswa

na Mwandishi wetu, Karatu

WAKULIMA wa shayiri wameombwa kuwatumia na kusikiliza ushauri wa wataalamu wa kanda.

Wito huo ulitolewa hivi karibuni na Meneja wa Kiwanda cha kuzalisha kimea cha Moshi, Vitus Muhusi, katika maonesho ya wakulima wa shayiri yaliyofanyika Kijiji cha Njia panda getini wilayani Karatu, mkoani Arusha.

Muhusi alisema utaratibu uliopo ni kwamba wakulima hao wanasaidiwa pembejeo, elimu na mafunzo bure kutoka kwa wataalamu washauri wa Kampuni ya Bia nchini (TBL), hivyo hawana budi kutumia fursa hiyo ya kipekee kwao.

“Wataalamu wetu wanajua katika kipindi hiki ili mkulima aweze kupata mazao yenye tija kwa mazingira haya yenye mabadiliko ya tabia nchi kwamba mkulima anatakiwa kufanya nini na nini,” alisema.

Katika maonesho hayo, Muhusi alibainisha kuwa kiwanda cha kuzalisha kimea kinahitaji tani takriban 15,000 za shayiri kwa mwaka ili kutosheleza mahitaji, hatua ambayo wakulima bado hawajaifikia.

Naye mkulima wa Shayiri kutoka Kijiji cha Rotia Kati, Anatoly Lohay, alisema ana ujasiri wa kulima kiasi cha ekari 200 kutokana na kuhakikishiwa soko na TBL.

“Naiomba TBL waendelee kusaidia wakulima ili waweze kuthubutu kufungua mashamba mapya zaidi,” alisema Lohay ambaye ana mpango wa kuanzisha mashamba mengine wilayani Sumbawanga.

CHANZO: DAIMA