Mererani waafiki mradi wa barabara

na David Frank, Simanjiro

WAKAZI wa mji mdogo wa Mererani, wilayani Simanjiro, Manyara, wameafiki utekelezaji wa mradi wa ujenzi wa barabara kwa kiwango cha lami utakaogharimu sh bilioni 26 ambao utajenga barabara ya Uwanja wa Ndege wa Kilimanjaro (KIA) hadi Mererani.

Hatua hiyo ilifikiwa juzi baada ya wakazi hao kupiga kura ili kubaini wanaopinga ujenzi huo uliopitishwa na serikali katika bajeti yake ya 2012/2013, ambapo ilionesha idadi kubwa ya wakazi wa mji huo wanaafiki mradi huo.

Akizungumza katika mkutano huo, Kaimu Katibu, wa mamlaka ya mji mdogo huo, Edmund Tibiita, alisema utekelezaji wa mradi huo wa kilomita 27 zitakamilika katika kipindi cha miezi 18.

Alisema kukamilika kwa barabara hiyo kutafanikisha kuunganisha mikoa ya Kilimanjaro na Arusha pamoja na mikoa mingine ya jirani ambapo utasaidia kuendeleza mji huo, ikiwa ni sambamba na eneo la viwanda (EPZA) litakalojengwa Manyara.

Alisema kuwapo kwa miradi hiyo kutasaidia upatikanaji wa ajira ambapo mkandarasi amekubali kutoa nafasi za ajira zipatazo 300 kwa wakazi wa mji mdogo.

Akizungumzia suala la ulipaji fidia alisema kutokana na barabara hiyo kupanda hadhi ya wilaya hadi mkoa na kumilikiwa na Wakala wa Barabara nchini (Tanroads), hivyo serikali italipa fidia kwa wale waliojenga umbali wa kuanzia mita 15 hadi 30.

Naye Diwani wa Kata ya Mererani, Justine Nyari, aliwataka wakazi hao kukubali changamoto zilizopo ili kurahisisha shughuli za maendeleo kufanyika kwa wakati, ikiwa ni pamoja na utekelezaji wa miradi mbalimbali.

CHANZO TANZANIA DAIMA