Nzega, Mbulu na Manyara zaungana kutoa elimu ya mazingira

WILAYA za  Nzega-Tabora, Mbulu-Manyara na Iramba mkoani Singida zimeanza mchakato wa kuunda timu ya wataamu kwa ajili ya kuielimisha jamii katika maeneo yao juu  afya  na usafi wa mazingira.

Hatua hiyo imekuja baada ya kufanyika kwa mradi wa majaribio katika kata tatu za Wilaya hizo na kuonesha mafanikio makubwa, huku katika maeneo mengine tafiti zikionesha kuwa zaidi ya asilimia 50 ya kaya hazina vyoo vinavyokubalika kiafya hali inayosababisha magonjwa ya mlipuko.

Meneja wa Shirika la SEMA-Singida  bwana Ivo Manyaku moja ya asasi zilizowakusanya wadau hao mjini Kiomboi Singida kwa siku tano, amesema lengo ni kupata timu ya wataalamu wa kuelimisha jamii na kuhamasisha juu ya  afya na usafi wa mazingira vijijini ili kupunguza magonjwa.

Mgeni rasmi katika ufunguzi wa mafunzo  hayo mkurugenzi mtendaji wa halmashauri ya Wilaya ya Iramba Bibi Halima Mpita anasema usafi wa mazingira ni muhimu katika kulinda afya za wananchi.

Mpango huo  wa kuunda timu ya wahamasishaji na waelimishaji jamii juu ya afya na usafi wa mazingira, umekuja baada ya kufanyika kwa mradi wa majaribidiio katika kata za  Mambali-Nzega,  Masieda-Mbulu na Mtoa Iramba ambapo kiwango cha ujenzi wa vyoo bora kimefikia zaidi ya asilimia 80.