Kufeli ni ajali, maisha lazima yaendelee

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Elimu ni silaha muhimu katika kupambana na changamoto za maisha. Hawakukosea waliosema kuwa “elimu ni ufunguo wa maisha” kwani mtu anapokuwa na elimu ya kutosha, siyo tu atakuwa katika nafasi nzuri ya kupata ajira, bali atapambana na mazingira yake ili kupata maisha bora.

Tangu kabla ya kuja kwa wakoloni katika karne ya 19, jamii za Kiafrika zilikuwa na mifumo mbalimbali ya kutoa elimu, ikiwa ni pamoja na jando, unyago na kufanya stadi za kazi.

Hata hivyo walipokuja wakoloni walileta mfumo mpya wa elimu ambao umeendelea hadi leo.

Kupitia mfumo huo, watu walifundishwa kusoma, kuandika na kuhesabu. Baada ya hapo mpangilio wa madarasa uliwekwa kutoka elimu ya awali, shule ya msingi, sekondari hadi vyuoni.

Kupitia mfumo huu kukajengeka dhana na mpaka leo inaendelea kuwa anayesoma mpaka madaraja ya juu ya elimu, hana budi kuheshimika katika jamii yake.

Hii ikajenga kasumba kwa wasomi wengi kujiona bora kuliko wanajamii wengine. Katika baadhi ya jamii usomi umekuwa na hadhi kubwa ikikaribia ile ya watawala.

Elimu na maisha

Pamoja na kuwa elimu ni muhimu kwa ustawi wa mwanadamu, wapo wanaoshindwa kuipata fursa hiyo kwa sababu mbalimbali ikiwamo kufeli na hivyo kushindwa kuendelea na masomo. Hawa naomba niwakumbushe kuwa kufeli ni sawa na ajali, hivyo hawapaswi kukata tamaa katika maisha yao.

Mtu hapaswi kukata tamaa kwa kukosa tu elimu. Kusoma siyo kupata vyeti tu, bali ni hali ya mtu kupata ufahamu wa mazingira yake.

Kama mkulima au mfugaji atafundishwa kusoma, kuandika na kuhesabu atayaelewa mazingira yake hivyo atapata urahisi wa kupambana nayo.

Ieleweke kwamba, kila binadamu huzaliwa na kipaji chake. Wapo wanaozaliwa na vipaji vya sanaa, wengine ni wabunifu wa mashine na vifaa mbalimbali vya kurahisisha kazi.

Mathalan, kabla ya kuja kwa wakoloni na mfumo wao wa elimu, Waafrika tayari walishakuwa na teknolojia zao. Walitengezeza majembe ya miti na baadaye ya chuma, walitengeza mitumbwi hata kama haikuwa na uwezo mkubwa na vifaa mbalimbali vya kurahisisha kazi.

Walipokuja Wazungu wakapuuza teknolojia hizo na kuziita za kishenzi. Wakabadilisha na kuleta za kwao kisha wakidai Afrika hakukuwa na maendeleo yoyote. Hiyo ilikuwa ni kudumaza akili za Waafrika na kuwadharau.

Baada ya kutawaliwa kwa muda mrefu na Wazungu, hata akili za Waafrika zikadumaa. Leo wengi hawaamini kama mtu anaweza kufanikiwa kimaisha bila kupitia mfumo rasmi wa elimu. Kwamba mtu akikosa elimu ile ya darasani ya vitabu na kalamu, basi ndiyo amekufa maskini.

Siyo kweli, bado Waafrika tunaweza kurejea kwenye teknolojia zetu na kuziendeleza. Inasikitisha kuona kwamba kila kitu tunachotumia leo kimeagizwa kutoka nje ya nchi. Sisi kazi yetu ni kutumia tu teknolojia za wenzetu siyo wao watumie zetu.

Inasikitisha zaidi kuona hata viongozi wa Serikali wamekosa ujasiri na uelewa wa teknolojia zetu. Utashangaa kuona wabunifu wanaounda magobore wanakamatwa na kufunguliwa mashtaka.

Hatutaki kujua kuwa kumbe watu kama hao wangeweza kukusanywa na kuundiwa karakana zao ili waendeleze uzalishaji kupitia vipaji walivyonavyo.

Wapo wanaounda baiskeli, magari, matrekta na vifaa vingine vinavyotumia vifaa halisi katika mazingira yetu, lakini wanachoambulia ni kupewa vyeti tu na taasisi za Serikali kisha wanasahaulika.

Taasisi ya Sayansi na Teknolojia inapaswa kuwakusanya watu kama hawa na kuwaendeleza. Mwisho tutajikuta na sisi tunaunda vifaa vya kisayansi ambavyo tutavitumia na hata kuuza ujuzi huo nje ya nchi.

Jambo la msingi ni kila mtu kujituma na kufanya kazi kwa bidii ilimradi tu anayo afya na akili timamu. Kama ni kilimo, uvuvi, ufundi mchundo na biashara basi zifanyike kwa bidii. Lazima mafanikio yapatikane tu.

Tatizo ni kuwa vijana wengi waliokosa elimu vijijini hawaamini kama kuishi huko ni maisha na inawezekana kuendelea kimaisha. Wengi hukimbilia mijini wakiamini kuwa watapata maisha bora na badala yake wamejazana mijini kufanya biashara ndogondogo.

Ni kichekesho mtu kuacha ardhi yenye rutuba kijijini kwake na kwenda mjini kuuza soksi, pipi, maji na nyembe barabarani.
Chanzo;Mwananchi