HANANG YAUNDA KAMATI YA ELIMU BURE.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

HALMASHAURI ya wilaya ya Hanang mkoani Manyara, imeunda kamati ya ufuatiliaji utekelezaji wa maelekezo ya serikali kuhusu elimu bure itakayowahusisha watendaji wa kata, wazazi, wakuu wa shule na wataalamu wa elimu.

Mkurugenzi Mtendaji wa Halmashauri hiyo, Felix Mabula alisema hayo jana wakati akizungumza na waandishi wa habari ofisini kwake kuhusu namna walivyojipanga kuhakikisha mpango wa elimu bure unafanikiwa.

Alisema, kuundwa kwa kamati hiyo kutasaidia ufuatiliaji wa karibu wa kuhakikisha wazazi au walezi hawatozwi michango iliyokuwa nje ya maelekezo ya serikali pamoja na kutekeleza waraka Namba 5 na 6 kuhusu elimu bure.

Alifafanua kuwa, Halmashauri ina wajibu wa kusimamia utekelezaji wa waraka huo katika kuainisha majukumu ya wazazi, walimu, Bodi za Shule na Kamati za Kata (WDC) na kufuatilia utozaji wa michango isiyoidhinishwa na waraka huo.

Aidha, alisema kamati hizo zitahakikisha bodi za shule na wazazi zinakutana mara kwa mara na kupanga matumizi sahihi ya namna watakavyowapatia watoto wao chakula shuleni.

“Tunafuatilia kwa karibu ili kuhakikisha kuwa walimu wakuu pamoja na bodi ya shule wanapata ufafanuzi kuhusu miongozo na waraka ilivyoainishwa ili kuweza kusimamia majukumu yao vizuri,” alisema Mabula.

Katika hatua hiyo alieleza kuwa Halmashauri ya wilaya ya Hanang imepokea Sh 11,456,000 zikiwa ni fedha kutoka Serikali Kuu kwa ajili ya elimu bure kwa shule za msingi na sekondari, huku wakipokea Sh 64,642 kwa shule za sekondari na shule za msingi ni Sh 49,918,000.

Naye Ofisa Elimu wa Shule za Sekondari katika Halmashauri ya Wilaya ya Hanang, Omary Maje alisema, wametoa maelekezo kuwa mtoto asiachwe kupelekwa shule hata kama mzazi wake hajachangia michango ya chakula shuleni, kamati husika zina jukumu la kumfuatilia mzazi huyo kuhakikisha anachangia chakula hicho.

Alisema, kupunguzwa huko kwa michango kumesababisha mwitikio mkubwa wa mahudhurio ya wanafunzi kwani mpaka Januari 26, jumla ya wanafunzi 1,889 kati ya 2,386 waliochaguliwa sawa na asilimia 79.1, wameingia shuleni.

CHANZO ; HABARI LEO.