Mkutano wa wakulima, wafugaji wavunjika

Manyara. Wakati Jeshi la Polisi likilazimika kufyatua mabomu ya machozi kuwatawanya watu, Naibu Waziri wa Maendeleo ya Mifugo na Uvuvi, Benedict Ole Nangoro, ametuhumiwa kuchochea mgogoro wa wakulima na wafugaji Wilayani Kiteto mkoani Manyara.

Aidha, Kamanda wa Polisi wa Wilaya ya Kiteto, Foca Dinya, alituhumiwa kwa kuwapendelea wafugaji na kuwakandamiza wakulima pindi inapotokea vurugu kati ya wakulima na wafugaji.

Tukio hilo lilitokea juzi jioni katika mkutano wa hadhara ulioitishwa na wakulima na wafugaji wa Kijiji cha Kibaya wilayani humo.

Dalili za vurugu katika mkutano huo, zilianza kuonekana baada ya Mwenyekiti wa chama hicho, Hassan Lusioki kuanza kuhutubia ambapo wafugaji walisikika wakitaka kuuliza maswali.

Hata hivyo, Lusioki alilazimika kuwatuliza kwa kuwaeleza mkutano huo unalenga kuzungumzia matatizo yanayowakabili, hivyo wangepewa nafasi ya kuuliza maswali  baada ya yeye kuhutubia.

Licha ya ahadi hiyo, upande wa wafugaji uliendelea kudai huku baadhi yao wakiendelea kuwafukuza wakulima waliokuwa wamekaa upande waliokuwa wamekaa.

“Mkutano huu ni wakulima na wafugaji, hamna haja ya kubaguana mnaweza kuchanganyika kwa pamoja,”alisikika akisema Lusioki.

Kauli hizo zilionekana kuzidi kuwachefua wafugaji, hali ambayo ilimlazimu Dinya kuingilia kati kwa kuchukua kipaza sauti na kutangaza mkutano huo umevunjika.

Hata hivyo, wakulima na wafugaji waliendelea kukusanyika katika vikundi barabarani, hali iliyolilazimu jeshi hilo kuwatangazia watawanyike lakini walikaidi na ndipo walipofyatua mabomu.

Akizungumza na waandishi baada ya mkutano huo kuvunjika, Lusioki, alisema Serikali inaweza kuumaliza mgogoro huo wa Hifadhi ya Emboloi Murtangosi, kwa kuviachia vijiji kupanga matumizi bora ya ardhi kwa mujibu wa sheria ya ardhi namba nne na tano.

Nangoro alikanusha kuhusika na uchochezi na kusema mgogoro huo unasababishwa na watu kutoka nje ya wilaya hiyo.
Chanzo;Mwananchi