WAKAZI wa kijiji cha Naisinyai wilayani Simanjiro mkoani Manyara
wameandamana na kuzuia shughuli za utengenezaji barabara ya
Kia-Mirerani, kwa kiwango cha lami wakidai kukatiwa mabomba ya maji.
Ujenzi wa barabara hiyo yenye urefu wa kilometa 26 unaotekelezwa na
Kampuni ya China Henan International Cooperation Group Co Limited
(Chico) ya China ni wa Sh bilioni 32.2 zinazolipwa na Serikali kwa
asilimia 100.
Wananchi hao zaidi ya 300 wakizungumza juzi kwenye eneo hilo walidai
kuwa ni zaidi ya miezi saba tangu mabomba yao ya maji yaharibiwe na
matingatinga ya kampuni hiyo, hakuna jitihada zozote zilizochukuliwa ili
kuyatengeneza au kuyaunga ili waendelee kupata huduma ya maji.
Mmoja wa wakazi hao, Toima Makeseni, alisema anaendesha mradi wa
kuosha magari kwenye eneo hilo, hivyo kukosekana kwa maji kutokana na
kukatwa kwa mabomba hayo kumesababisha asimamishe kazi hiyo kwa muda
huku akiendelea kudaiwa ushuru wa halmashauri na mapato mengine ya
serikali.
“Ni muda mrefu tuliwaeleza kuhusu tatizo hilo ili watengeneze
miundombinu ya maji waliyoiharibu lakini walituzungusha kwa miezi saba
na kutufanya tukwame kuendesha shughuli zetu,” alisema.
CHANZO GAZETI LA HABARI LEO
0 comments:
Post a Comment